चैत मसान्तसम्म योजना सम्झौता सक्नुपर्ने - JamarkoOnline

चैत मसान्तसम्म योजना सम्झौता सक्नुपर्ने

पथरीशनिश्चरे, ३० फागुन
मोरङको पथरीशनिश्चरे नगर कार्यपालिकाको पछिल्लो बैठकले चालु आर्थिक वर्षका लागि चैत मसान्तसम्म सम्पूर्ण योजनाहरु सम्झौता गरिसक्नु पर्ने निर्णय गरेको छ ।
नगर प्रमुख दिलीपकुमार राईको अध्यक्षतामा बसेको बैठकले १ महिना अवधि थप गरी चैत मसान्तसम्म बनाएको प्रवक्ता यामप्रसाद गुरागाईंले बताए । नगर तथा वडामा फागुन मसान्तसम्ममा सम्झौता गरिसक्ने अवधि तोकिएको भएपनि योजना सम्झौता नसकिएकाले म्याद थप गरिएको हो ।
यसका साथै बैठकले पाँचौ नगरसभाबाट विपन्न आवासका लागि छुट्याएको ३० लाखबाट जग्गा खरिद गर्न निर्देशन गरेको छ । त्यस योजनाको घरको जस्तापाताको छानोका लागि छुट्याएको २० लाखबाट ८ फुटे जस्तापाता खरिद गर्ने निर्णय भएको छ । जसमा चैत मसान्तभित्र जग्गा खोजविन गर्न कार्यपालिका सदस्यहरुलाई जिम्मेवारी समेत दिइएको छ ।
बैठकले, संघीय मामिला तथा सामान्य प्रशासन मन्त्रालय अन्तर्गतको तराई मधेश समृद्ध कार्यक्रम केन्द्रीय समन्वय इकाईमा सामुहिक आवास, सामुदायिक पूर्वाधार, साना सडक स्तरोन्नती सहितका योजना माग गर्ने समेत निर्णय गरेको छ । जसमा कृषि विकास, खानेपानी तथा सरसफाई, सिंचाई तथा नदी नियन्त्रण, उर्जा, विपद् न्यूनिकरण र पारम्पारिक पेशा प्रवद्र्धनात्मक एवम् आयआर्जन तथा जीवनस्तर सुधार कार्यक्रम पनि पेश गरिने छ ।
नगरका सामुदायिक विद्यालयहरुको शैक्षिक गुणस्तर सुधार तथा बृद्धि कार्यक्रमका लागि प्रदेश १ को आर्थिक मामिला तथा योजना मन्त्रालय, सामाजिक विकास मन्त्रालय सहितका सरोकारवाला निकाय समक्ष माग पेश गर्ने पनि निर्णय गरेको छ । त्यसैगरी, नगरको विपद व्यवस्थापन उपसमितिमार्फत नगरका जोखिममा पर्न सक्ने वस्तीहरुको पहिचान गरी सम्वन्धित सरकारी निकाय समक्ष विपद् व्यवस्थापनका लागि माग गर्ने सहितको निर्णय भएको उल्लेख छ ।

सम्बन्धित खवर