अमेरिका बिरुद्ध इरानले गर्यो युद्धको घोषणा - JamarkoOnline

अमेरिका बिरुद्ध इरानले गर्यो युद्धको घोषणा

एजेन्सी, २० पुस
अमेरिकी एयर स्ट्राइकमा इरानी कमाण्डर कासिम सुलेमानीको मृत्यु भएपछि अमेरिकाविरुद्ध इरानले युद्धको घोषणा गरेको छ ।
इरानले हिजो कोमस्थित जामकरन मस्जिदको डोममा सधैं फहराउने धार्मिक झण्डा निकालेर रातो झण्डा फहराइ युद्धको लागि देशभर अलर्ट जारी गरेको बेलायती मिडिया मेट्रोले जनाएको छ । तनावपूर्ण स्थितिमा यसरी रातो झण्डा फहराउनुलाई ‘युद्धको लागि तयार रहनू, युद्ध सुरु भइसकेको छ’ भन्ने सन्देशका रुपमा बुझिन्छ । इरानले यसरी मस्जिदमा रातो झण्डा फहराएको पहिलो पटक रहेको यसअघि इरान र इराकको युद्धको बेला पनि यसरी रातो झण्डा फहराइएको थिएन ।
इतिहासमा हुसैन साहबले कर्बला युद्धको बेला मस्जिदमाथि रातो झण्डा फहराएका थिए । यो रातो झण्डा रगत र शहादतको प्रतीक मानिन्छ । अहिलेको स्थितिमा सुलेमानीले देशको लागि शहादत दिएको र यसको बदला लिनको लागि देशवासीलाई तयार रहन भनिएको रुपमा यो झण्डा फहराइएको छ । जामकारन मस्जिदलाई इरानको सबैभन्दा पवित्र मस्जिद मानिन्छ र यहाँको युवाहरुमा यसको गहिरो प्रभाव छ ।
उता इराकको राजधानी बगदादमा अमेरिकी दूतावासमा रकेट आक्रमण भएको छ । अमेरिकी दूतावासभित्र रकेट प्रहार भएपछि भागदौड मच्चिएको थियो । सूत्रका अनुसार बगदादको ग्रीन जोनमा अमेरिकी दूतावासभित्र कत्युषा रकेटबाट आक्रमण भएको हो । यो आक्रमणमा कति मानिस हताहत भए भन्ने प्रस्ट जानकारी आइसकेको छैन । अमेरिकाले इरानका सैनिक कमाण्डर जनरल कासिम सुलेमानीको हत्या गरेलगत्तै यो आक्रमण भएको हो । इरानले सुलेमानीको हत्याको बदला लिने घोषणा गरेको थियो ।

सम्बन्धित खवर